Journey of සහස්නා Apparel

2006 වර්ෂයේ ආරම්භ කළ සමාජසත්කාර.lk යනු රාජ්‍ය නොවන ලාභ නොලබන මෙන්ම අවම ශ්‍රමයක් තුළින් වැඩිම සේවාවක් ගම් නියම් ගම් උදෙසා දොරින් දොරට ලබා දෙන එකම සංවිධානය වේ. අප විසින් විවිධ වූ ව්‍යාපෘති ගණනාවක් අසරණ පවුල් වෙත සිදු කර ඇත. සෑම විටම කිසිවකුගේ අවධානයට ලක් නොවූ අසරණ පවුල් සොයා ඔවුන් අසළටම යමින් පිහිට වීම අපගේ සංවිධානයේ මූලික පරමාර්ථය වේ.

මෙහිදී දිළිඳු භාවය පිටු දැකීම උදෙසා සුවහසක් ශ්‍රී ලාංකික දුගී දුප්පත් ජනයා හට නිතර පිහිට වීමට වඩා ඔවුනට ස්ථීර පිළියමක් ලබා දීම කෙරෙහි සමාජසත්කාර අපගේ අවධානය යොමු විය. එහිදී එම පවුල් වෙත ආදායම් මාර්ගයක් සකස් කරගැනීම වෙනුවෙන් ස්වයංරැකියා ලබා දීම සඳහා විශේෂ ව්‍යාපෘතියක් ආරම්භ කරනු ලැබුවා. සහස්නා Apparel හි බිහි වීම ආරම්භ වූයේ එමඟිනි. 
මීට වසර කිහිපයකට ඉහතදී අප වෙන් වෙන් වශයෙන් අසරණ පවුල් වෙත මහන මැෂින් ලබා දුන් අතර, එසේ මසා නිම කරන ඇඳුම් අලෙවිය සඳහා මැහුම් ශිල්පය නොදත් පිරිස් හට ලබා දීම තුළින් දෙපාර්ශවයම ආදායම් ලබනු ඇති බව වැටහුණා. ඒ අනුව අප මැහුම් කලාව දන්නා පිරිස් හට මහන මැෂින් සහ ඊට අවශ්‍ය සියළුම කළමණා ලබා දෙන අතර ඔවුන් විසින් මසා නිම කරන ඇඳුම් මැහුම් කලාව නොදත් පිරිස හට යම් මිලකට අලෙවි කිරීමට අවස්ථාව ලබා දී තිබෙනවා. මෙම කටයුත්ත තව දුරටත් වර්ධනය කරමින් සහස්නා Apparel නමින් ආරම්භ වූ මෙම ඇඟලුම් ව්‍යාපාරය ගම් නියම් ගම්හි වෙසෙනා අන්ත අසරණ පවුල් සොයා යමින් හැකියාව මත ඇඳුම් මැසීම හෝ විකිණීම කෙරෙහි ඔවුන් උනන්දු කරවීම සිදු කරනවා. එසේම ඔවුන් විසින් මසා නිම කෙරෙන ඇඳුම් වල තත්ව පරික්ෂාව සහ ලේබල් ගැසීම දියතලාව ප්‍රදේශයේ පිහිටි අපගේ ප්‍රධාන ශාඛාවේදී සිදු වනවා. එහිද සේවය සැපයීමට අන්ත අසරණ දුගී පිරිස් යොදවා තිබෙනවා. ඔවුනට මාසික වැටුපක්ද හිමි වනවා.
එහිදී අවශ්‍ය උපදෙස් ලබා දීම හා මඟ පෙන්වීම ඇඟලුම් ක්ශේත්‍රයේ වසර 23ක පමණ පලපුරුද්දකින් හෙබි නිලන්ති එදිරිසූරිය මහත්මිය විසින් සිදු කරනවා. මේ වන විට පවුල් 15කට පමණ මේ තුළින් ආදායමක් ලැබීමට හැකි වී තිබෙන බව ඔබට සතුටින් දැනුම් දීමට කැමැත්තෙමු